قصة مذكرات شاب سعودي في امريكا

قصة مذكرات شاب سعودي في امريكا

قصة مذكرات شاب سعودي في امريكا كاملة مكتوبة

السلام عليكم ورحمة الله وبركاته ….انا مرة ثانية بس هالمرة بسافر للولايات المتحدة الامريكية والحجة هي نفسها الحجة المعهودة لدراسة وتطوير مستواي في اللغة الانجليزية وطبعا العاقل هو اللي يتعلم من اخطائة السابقة جهزة ورقة موافقة ولي الامر على السفر بشكل رسمي وكل شي كان مضبوط قصدي مضبوط حسب رايي .

رحت لمكتب معهد شهير مابي اذكر اسمه علشان ما اخرب بيتهم المهم رحت استفسر عن الاسعار وقالوا لي كل شي سهل وحلو بس الفيزا يبي لك ان تنتظر نموذج (A20)وبس قلت وش هذا قالوا لي الفيزا الدراسية ….المهم ما اطول عليكم ياحلوين قالوا لي يوم الاربعاءالصباح يوصل وتروح به على السفار والسبت بالكثير تستلم الفيزا قلت اوووكيه وياليتني ماقلت جيت الاربعا في الصباح مبسوط وانا اقول لهم بسرعه هاتوا A20وراي سفارة قامت عيونهم تتقلب ويناظرون بعض قلت خير لاتقولون انه ماوصل قالوا الا بلا وصل قلت طيب قالوا لس مو لك هذا بالغلط حق واحد كولومبي قلت كولومبي قالوا ايه قلت وين احنا ووين كولومبيا وماسكين علي بالتوصيل العالمي السريع وبتوصله لك الشركة الفلانية واخرتها مو لي طيب وش اسم اخونا بالخير قالوا فرناندو ارااسئيل قلت حول اسمي يعني عبدالعزيز وفرناندوا مافرقت الا حرف او حرفين او 10 حروف المهم وش السواة قالوا انتظر قلت طيروا وش انتظر السفر يوم الاحد بالليل وش انتظر زود قالوا لي مالك الا يوم تروح السفار ة وتقدم على فيزا سياحية قلت تم رغم فارق السعر ورغم كل شي طمرت للسفارة الامريكية لقيتها مسكرة لان اليوم كان 4 يوليو العيد الوطني لامريكا وش الدبره مالك الا يوم السبت ويوم السبت صحيت ديك جيراننا اذن ومشيت للسفارة ووقفت في الطابور الى ان دخلت وقدمت اوراقي وكل شي تمام قالوا لي تمر يوم الاثنين تستلمها قلت لهم لا حجزي بكرة الليل قالوا لي لا يوم الاثنين وجلست انا وموظف في بنك كبير نترجاهم يطلعونها لنا اليوم وجات موظفة كبيرة في السفار تكلمت معنا شوي وقالت خلاص وحطت على جوازاتنا مستعجل الحين تقولون كل شي تمام صح …هههه معصي الحلا قدام قالت لنا اليوم العصر تستلمونها وجيت يوم العصر مثل الفارس الهمام اللي مسوي انجاز عظيم وجلست احكي للي جنبي عن مرونة السفارة الامريكية وتفهمهم لظروف المواطنين وقلت المفروض ربعنا يتعلمون منهم وعن اهمية اللغة الانجليزية واها سهلت مهمتي في اقناعهم وشوي يجي دوري وعلى خشتي(فمي) ابتسامة كبيرة ولا اكبر منها وماد يدي ناظر فيني الموظف وقرا اسمي قال لي (سوري سير يو دونت هاف فيزا)بيني وبينكم حسبتهم ضيعوا جوازي ومستحيين ساعتها انا ثرت وتخيلووني وانا ثاير وقمت ارطن بانجليزيتي هاو ووين وواي يعني كل اللي قدرني الله عليه المهم مل الموظف مني وقال لي ان الكمبيوتر في امريكا رفض منحي الفيزا قلت ليه قال مدري وجلست اعل قلبه الى ان نادى مديره لي وجاني رجل جثة اخذني على جنب وشرح لي كل شي بصوت عالي وقال التالي-تم ترجمة الكلام الى اللغة العربية لان الموظف طبعا مايحكي عربي مايبي لها ذكاء-(الكمبيوتر في امريكا رفض اعطائك الفيزا لانه اشتبه في هويتك وانك خطر على الامن القومي الامريكي )هو وصل خطر على الامن القومي الامريكي وقالها بصوت عالي ساعتها الصالة كلها انخبصت وكل قام يناظرني ويقول اللهم حوالينا ولاعلينا انا نفسي انخبصت كلاي طاحوا بالارض وش خطر على الامن القومي فيه اصلا عمري مارحت لامريكا وانا احبها سيارتي كراون فيكتوريا يعني امريكيه احب مايكل جاكسون اشوف افلام امريكية يعني كيف خطر قال لي لاتهتم هذي المشكلة تصير كثير انتظر فترة يتحققون منك وبعدين بيعطونك الفيزا قلت مده يعني كم قال اسبوعين بالكثير واذا حظك حلو قبل وانا طالع سمعت كلام يسم البدن الله لايوريكم شايب يقول الله يصلح الشباب والثاني يقول هذا من نتايج بعد الاهل واللي يقول المتدينن وش يبون بس صراحة موقف غريب موقف ابد ماينوصف اروح ابي استلم فيزا وارجع وانا خطر على الامن القومي الامريكي من هول الصدمة طلعت ونسيت بيجري عند البوابه وماتذكرته الا في المغرب واروح ثاني يوم للسفارة ويقولون لي وديناه للمكتب الامني قلت هلا هلا كملت صرت خطر بجد وصلت للبيت علمت امي عن الخبر السعيد اني اصبحت خطر على الامن القومي الامريكي وجلست امي تسمي علي وعلمت ربعي وابعدوا كلهم عني واحد منهم مايحاكيني الى الان بيني وبينكم كان شعور حلو انك تكون خطر على الامن القومي الامريكي يعني حركة تطلع لشارع التخصصي يقولون وين اثباتك تقول معقولة ماعرفتني الى الان ولاتستهبل المهم كل يوم كنت اتصل على السفارة اسئل وصلت الفيزا ولا لا وطبعا كل يوم لا, طنت لي فكرة اني اروح لنيويورك وبعدين منها الى كندا وعلمت السفارة قالوا لي لو ندري انك دخلت اراضي امريكية حتى لو مانزلت من الطيارة بنعتقلك ساعتها تفاؤلت خير يعني هم ناويني بنية زينه انشاء الله شي مطمئن اسبوعين وانا شبه معزول عن العالم والافكار تروح وتجي في راسي يعين اروح استراليا ولانيوزلندا ولا السودان طيب يعني الا ن انا واسامة بن لادن عند الحكومة الامريكية واحد يعني اسامة بن لادن صار صديقي وساعه تطن في راسي افكار منها بما اني فعلا خطر على الامن القومي الامريكي فمن باب اولى ان خطر على الامن القومي السعودي يعني اسبوعين من احلام وكوابيس ماكان يخفف عني الا اني عرفت كل الموظفين في السفارة الامريكية لاني كنت اتصل كل يوم مرتين الى ثلاث مرات عليهم الى ان جا الفرج دقيت في يوم وقالت لي صديقتي قصدي الموظفة ان الفيزا وصلت قلت فيزتي قالت ايه قلت قولي والله قالت وات قلت ولاشي جايك جايك وكلها 5 دقايق الا وانا مرتز هناك قدامهم ووقفت في الطابور ولما وصل دوري واستلمت الفيزا تعالوا شوفوا العاطفة وقمت اذرف الدمعه مو علشان الفيزا لالالا علشان اني ما ني خطر على الامن القومي الامريكي صراحة مو بس انا اللي بكيت كل اللي حولي نزلت الدمعه من عيونهم حتى ان موظفين السفار ة حاشتهم العبرة هم بعد وسمعت شايب يقول شرف الولد زي عود الكبريت الله يسامحكم بس طلعت وكل من في السفارة يبكون وقلت خلاص مابقى الا الحجز والتذاكر ونطير على امريكا.واروح عند اكثر خلق الله امانة وصدق في التعامل مع المواطنين ايوة بالضبط رحت للخطوط السعودية ومكتبهم في حي السفارات وقلت ابي تذكرة على رحلة اليوم صراحة الموظف كلف نفسه رفع راسه وقال الطيارة مليانة مافي حجز قلت له تاكد بالله قال لي متاكد قلت والحل قال مدري قلت خلني انتظار قال كثيرين اللي انتظار قلت له أي درجة قال الطيارة فل قلت لنفسي شكله بكاش طيب قص لي انتظار قال يعني انت فاضي بتروح على امل الانتظار قلت له ايه عادي اخيرا تحرك وسوا لي انتظار وطلعت منه على بيتنا اجري اتصالاتي علشان القى واسطة وبالفعل قال لي اخوي رح مكتب السعودية رحت ونفس الشي قالوا لي فل بعدها بدقيقتين دق علي اخوي بيجري اللي استرديته من سفارتهم ويوم اتصل عليهم عطاني رقم الحجز وقال قص صعود الان كلكم الان تقولون انتهت مشاكله وين وين تو الناس بكير على هالكلام رحت للمطار وصعدت الطيارة وكل شي تمام ,واااااااااو وبعد على الاسطول الجديد هالمرة لاجنبي بنات ولا شي المهم قروي اول ماركبت باشغل التلفزيون الشخصي جانا مضيف قال شوي لو سمحت قلت طيب المهم طارت الطيارة وشوي و تطفى الانوار في حركة نذاله وش القصة قالوا عادي لين ترتفع الطيارة باشغل التلفزيون ما اشتغل قالوا عادي لين ترتفع الطيارة صار كل اللي في الطيارة يدعون ان ترتفع الطيارة وبعد شوي بدى الكل يتكلم عن التلفزيون اللي ما اشتغل يعني مو انا بروحي شوي واعلن الخبر السعيد ان كمبيوتر الطائرة قد تعطل الله ياحلوة من خبر يعني لاراح يكون فيه تلفزيون ولا العاب ولا حتى انوار شي حلو هنا وهنا فقط اعلن عن تدشين اذاعه خالد للصياح من خالد ماتعرفون خالد من مايعرف خالد هذا الله سلمكم ثالث ثلاثة اولاد لسيدة سعودية عمرها في 27-29 بس سيدة حلوة عمره مابين 1-3 سنين بس ماشاء الله تبارك الله عليه بطارية صياح تستمر وتستمر المهم المهم في هالاثناء في واحد ثاني اشتغل لا لا تظنونه بزر هالمرة المكيف يقولون ان الكمبيوتر سكر كل شي وشغل المكيفات على اخرها وقلبنا في الاسكيمو وبدت مكرمة خادم الحرمين الشريفين احم احم وش انا اقول المهم بدوا بتوزيع البطانيات بمعدل بطانيتيي الى 3 لكل راكب وكل ماعطوني بطاني خذتني الفزعه لخالد وامه واقول لها تفضلي لان خالد كان يبكي من البرد وكل ما مرت المضيفة شافتني بدون اقصد بدون بطانية عطتني بطانية وكل ما خذيت البطانية ون خالد واقوم بابتسامة كبر وملئ وجهي اناولها لامه المهم من شدة البرد تقرفصت بمكاني وكل تجمعت بشبر وصرت اتلحف بشنطتي وكل هذا خايف ان خالد يجييه برد ياخالد هذا ولاهو يقدر الجميل ويبكي ويستمر ويجهش في البكا المهم طلعت الشمس وشفنا نور ربنا وجابوا الفطور وكلها ساعتين ووصلت الطيارة نيو يورك وينزلون 3\4 ارباع الركاب وساعتها يشتغل عمنا الكمبيوتر وكل شي يصير حلو بس ياحسافة نص ساعه بس الى واشنطن ووصلت هناك على خبري مطار دولي توقعته كبير واثاريه خرطي صغير مرة وانا وراي رحلة الى لوس انجلوس على الامريكان ايرلايانز المهم خلصت كل اوراقي وصعدت الطيارة الثانية عالم غريب ناس زحمة كل شي مختلف بيني وبينكم اول شي خفت وبعدين قلت وش بيصير يعني وصلت الى لوس انجلوس خذيت تاكسي ورحت على بيت العايلة اللي مفروض اسكن عندها على فكرة قبل ما اطلع للمطار وانا في الرياض دقيت على عايلتي وقلت لهم اني باجيكم الخميس لاني كنت حاسبها بتوقيتنا والاساس اني وصلت لهم الاربعاء بتوقييتهم .

وصلت للبيت وفتحت لي الباب –لا لا هالمرة ناس في احجامنا مو زي عايلتي في بريطانيا وناس صغيرة راية البيت عمرها 79 سنة وزةجها 80 سنة يابلاش المهم استقبلتني استقبال حار صرت اشيل شنطي بيد واسندها باليد الاخرى وودتني الى غرفتي صرت انا واياها في غرفتي بروحنا ياشين تفكيركم لا لا ولاصار اللي في بالكم اصلا ابليس طلع بادبه حامت كبده منها المهم في 5 دقايق معزبتي قامت تشرح لي اسرار الكون وكني جاي من اعماق الصحراء او مكتوب على وجهي غبي قامت توريني فيش اللمبة وتقول اون لايك ذيش واوف لايك ذيس والمرووحة وتقول اون لايك ذيك اند ذيس اوف حتى الحنفيات لايك ذيس اوبن اند لايك ذيس كلوس يعني وشلون افهما اني اعرف كل هذا المهم طلعت بي للصالة عندما يئست من ابليس بتوريني كيف يشتغل التلفزيون قمت سبقتها وخذيت الريموت كونترول قلت لها لايك ذيس اوبن اند لايك ذيس كلوس وش رايك فيني احرجتها بهالحركة ياحلوي المهم جلسنا ننتظر راعي البيت وحامي حماه زوجها وكذلك الياباني اللي ساكن معي .

المهم صحيت بعد اول ليلة في امريكا قمت زي أي شاب نشيط ورياضي ورحت اجري لي ساعة قبل ما اروح للمعهد وانا اجري الا والجو غيوم وشبه بارد وانخميت فيه (جزا اللي ينسى دروس الجغرافيا ونسيم البر والبحر المهم لبست ملابسي بروح مع ابوي الامريكي اقصد صاحب البيت ووداني للمعهد طبعا على شوفة الغيوم والبرد لبست ذاك القميص الصوف واحد من اثنين ثقال جبتهم معي ولبست كاب وخذيت مظلة للمطر ورحنا للمعهد الغريب واحنا في السيارة كل الناس كانوا لابسين اشياء خفيفة يعني معقولة كذا ياربي الناس اللي ماتصحى بكير تبتلش يعني تاخذ مقلب في الجو المهم وصلنا للمعهد وكل من شافني يتمقل فيني زين ويستغرب حتى انا كان وجهي مغسول بمرق واستغرب بعد ليه هم لابسين كذا المهم اجروا لي اختبار مستوى وحددوا مستواي طبعا على كيفهم جايهم متاخر اسبوعين وتوني رايح لصفي ومسمي بالله الا وتقول مدرسة الصف اليوم بنروح استديوهات سوني نسيت اقول لكم ان نص المعهد سعوديين واماراتيين ومعي في نفس الصف 7 خليجيين وماسمعوا هالخبر الا نطوا علي ياحظ يابو الحظ ياوجه الخير اول مرة يودوننا لرحلة ما امداك تجي ايه هين على الحظ قلت لهم اوووه ماشفتوا شي لو لاحقين علي في الرياض ان تنحاشون عني من زود الحظ اصلا قصة حصولي على الفيزا حظ ,المهم عزمني شاب اماراتي على الغدا واعتذرت له قلت له اصلا متعود ما اتغدى قال اخاف تجوع واحنا في الاستديوهات قلت لالا لايهمك …المهم رحنا هناك وحضرنا تسجيل برنامج عجلة الحظ حلقة مدتها نص ساعة تسجيلها ساعتين جات الساعة 3 العصر وخلصوا تسجيل الجزء الاول قالوا في راحة للجميع مدتها نص ساعه بيني وبينكم وقتها طقني الجوع من قلب ماصرت اقدر استحمل بعد نو واي وكلمت واحد من اللي ينظمون الاستديو (بليز وير از ذا ريستورنت)يعني بالعربي وين المطعم قام يوصف لي وياليته ماوصف لي طلعت من الاستديو وتحت الشمس والحر والجوع المهم لقيت الناس واقفة في طابورين واحد قصير والثاني طويل قلت بس هذا هو وصلنا ولاني احب السرعه رحت صفيت مع القصير الغريب اني ما شفت احد طالع باكل قمت وتعديت الصفوف ودخلت داخل الكشك لاحظت على يساري رجال وعلى يميني نساء وكل منهم يدخل مع باب قلت لنفسي اطل واشوف وش القصة طبعا ياشطار ياحلوين اشربوا الحليب قصدي عارفين انا من وين باطل طليت مع الباب اللي يروحون منه النساء وتوني باناظر ويصارخون علي السيدات كل ابوهم وات وات وات دو يو وانت واللي تشتم يعني صار موال رفعت راسي قريت اللوحة اثاري مكتوبrestroom يعني دورات المياه ساعتها عرفت اني رحت وطي والا اطلع بسرعه وارجع للاستديو واشوف اللي دلني على المكان قلت له وير دو يو سنت مي يعني وين ارسلتني بغيت توديني وطي ..المهم خلصنا ذاك اليوم من الرحلة وربي سترها معي ورجعنا للمدرسة الساعه 7 مساءا اخوكم هاوي سينما دخلت سينما ناظرت فيلم وانبسطت يوم جيت بارجع لبيتنا هناك المشكلة والمصيبه طلعت على الساعه 10 خذيت باص وبارجع للبيت وقفت عن اقرب مكان لبيت عايلتي وماكنت ادري ان شوارعهم ظلمة وفاضيه عادي عادي قمت اغني بالصوت الجهوري ولاعلى بالي وشوي والتفت والا وراي ذاك الكويحه العجوز الطويل الاسود ولامورغن فري مان وحاط قبعه ويمشي وراي ساعتها تعالوا دوروني عرقت وكلاي طاحوا بالارض وبديت ابي اسرع واكتشفت انه يسرع معي وش الحل اخاف اركض يركض مريت على كنيسة بغيت ادخل لها الا هي مقفله طيب وش السواة صرت كل ما وصلت لشارع باعديه قمت اركض بس ماش الحبيب خطواته كبيره لين كتب ربي الفرج ههههه وش صار؟؟؟ لف في حارة ثانية اثاري الجبان ابن الجبان خاف مني صدق ناس اخر زمن ورجعت اغني وولاعلى بالي …. اول ويك اند هناك رحت الى six flags مكان لطيف مرررررة والعابه حلوة وبريئة ولاتخوف ابدا اخطر قطار لعب هنا مايجي شي عندهم كنت مع المعهد وطلاب المعهد وصفينا في طوابير اول قطارات الموت كل واحد مزبن عمره الاانا لاني جديد هنا ماصار لي الا يومين وشباب جدة اللي معه بنت واللي اثنين مع بعض المهم اللي مصبرني قدامي بنت امريكية يعني موت معها عيد العيد مادريت ان حتى الامريكيين عندهم تقليد ركبت هي في عربة لوحدا وانا انااا انااا ركبت في عربة بروحي احلى شي قفلت العربه علي وبدى القطار في الرقص ايه قبل لاانسى من زين الحظ كنت انا اول عربة يعني فل سكرين المهم وراي بنتين مكسيكيتين واول مابدى القطار الكل قام يصيح الى ان اعلن عبدالعزيز عن اطلاقه لاذاعة نزلوني هو تحرك ولاماتحرك واسمعوا الصراخ نزلوووووووني الله يلعنكم لالالالالالالالالالالالالا وهلم جرا والبلية نحيف ومعصقل يعني اتقلب من الطرف الى الطرف اللي اذكره ان كل القطار هجد الااتا والبنتين اللي وراي قاموا يضحكون واحد يصارخ والبلا يصرخ بالعربي وفيما انا اتدربى انحشرت بين الحديدة وطرف العربة علقت يعني كملت وماصدقت اني نزلت مدري وش القصة على فكرة قطار الموت اللي ركبته هو اصغر واقصر واسهل واحد من الباقين يعني اللعب احلو خلاص قمت اقول رجعوني للرياض يازين ملاهي الحكير والناس تضحك اللي قاهرني في ناس كانت تحسبني امثل ورحت للعبة سوبر مان هذي العربة واحدة يعني الموت واحد وكل صف اربع كراسي وبعد ماكنت اصلا ضعت ولا صرت اشوف أي واحد معي في المعهد وانا انتظر دوري شفت عائلة امريكية مكونة من ام في الثلاثينات وولد عمره تقريبا 16 سنة وبنت عمرها 8 يكلموني يقولون ممكن تركب معنا ونسوي صف بروحنا قلت والله واحلوت الدنيا لك يابو ناصر وصار لك شعبيه تعالي يمه اسمعي وانتي بعد ياللي في بالي اسمعي صار علي طلبيات بيني وبينكم حسبتهم يعرفون وش صار لي في قطار الموت فقالوا خله يوسع صدورنا ابد طلعوا مقلب قالوا لي انت والولد على الاطراف واحنا الام والبنت في النص عادي ركبنا وانطلقت العربه في 4 ثواني احنا على ارتفاع 100 متر وفجاة كل شي توقف ووززززززز……رجعت العربة على ورى ولحظي الحلو انا في الصف الاخير عادي عادي المهم ماصار شي لظهري كثر ماصار لحلقي وخذيت صورة لنفسي في العربة الغريب يوم وريتها اهلي ماعرفوا يطلعوني قلت من في اللي جالسين فاتح حلقة على الاخر قالوا هذا قلت بس وصلوتوا هذا انا.واستمر الوضع كذا في لوس انجلوس ايام حلوة وايام مرة تعلمت هناك الانترنت وحبيتها الى ان مروا اسبوعين وصار حفل تخريج للشهر اخوكم من ذكرياته عن هالمناسبات جاي مرتكز اول واحد لان هذي مناسبات ماتنتفوت لكن لاسف ماطلعت زي بريطانيا كلها ينادون الواحد ياخذ شهادته ويمشي ولا احضان ولايحزنون ونتيجة للصدمة قررت اسافر في الويك اند لسان فرانسسيكو.

في فجر يوم السبت خذيت تاكسي ورحت للمطار علشان بروح لسان فرانسسيكو وصلت المطار كل شي حلو ركبت الطيارة على خطوط continintal خطوط رخيصة وصلت سان فرانسسيكو ولاني زي ماقلت لكم الواحد يتعلم من اخطائه فما صار ينخدع بنسيم البر ونسيم البحر لابس صيفي خفيف واسمك قميص معي شفاف وصلت سان فرانسسيكو الجو غيم وشوية مطر ضحكت قلت زي كل يوم صبح في لوس انجلوس يعني ساعتين وتنقشع الغيوم جلست في المطار ادور فندق لقيت دعاية فندق ايطالي حلو شكله من برا جنان وموقعه زين واسعاره رخيصة خذيت عنوانهم وركبت تاكسي ووصلنا وياليت ماوصلنا فتحت عيني الا وانا بالداون تاون عبيييد في كل جهة ومجاري يطلع منها دخان وشباب يتطاقون وقف التاكسي قال وصلنا قلت نعم قال وصلنا بغيت اقول له رجعني للمطار قال هذا الفندق قلت لا وين مايصير شكله مو هو غير اللي في الصورة قال ابدا هذا هو نزلت وعظامي تنافض وش جابني للداون تاون دخلت لقيت موظف الاستقبال وابن صاحب الفندق واللي يشيل الشنط هو شخص واحد وطلع فلبيني طبعا بعد دقيقتين هدت اعصابي وقام هو يطمني ان المنطقة امان وانهم اذا ماتحرشت بهم مايتحرشون فيك هين اتحرش بهم مال من عمري انشالله حطيت شنطي وطلعت ابي اتمشى في سان فرانسسيكو الساعه الان 11 ص والجيو زي ماهو غيوم والبرد زاد على فكرة سان فرانسسيكو ديرة صغيره تقدر تقطعها مشي ووصلت للبحر ابي اروح سجن الكتراز ازوره التذاكر حقته كلها بيعت طيب وش الحل مافي الا السوق السودا ايه ناس تبيع التذاكر بسعر اعلى رحت لواحد قلت له بكم (التذكرة سعرها اصلا15 دولار)قال لي ابيعك بخمسين قلت نعم قال خمسين قلت طيب لانه حرام ازور سان فرانسسيكو ولا ازور الكتراز طلعت له خمسين قال لي لا تروح هناك تشتري لي تذكرتين كبار وتذكرتين اطفال لما بعد اسبوعين وزي الاهبل رحت وشريتها له وجلس يحط يده على كتفي ويقول لي شاطر جووود جوود شفتوا الذل على اصوله ..المهم الساعه 1 والغيوم تزيد والبرد فوق العادة واسمع صراخ بنات سن سن ذير از ذا سن يعني طلعت الشمس هناك عرفت ان في شي عم بيصير وان سان فرانسسيكو غير باقي مدن كاليفورنيا جوها بارد في الصيف بس وش عقبه الواحد لفحه البرد وطيره تطيير ورحت الكتراز ورجعت وجلست اتمشى في هالديرة وسط البرد والgays في كل جهة صدق صدق هالمدينة تحسس الولد انه مطلوب وله قيمته وسعره يعني لا سمح الله لو ضاعت قروشك ولا انسرقت ماتخاف تعرف كيف تدبر لك قروش بسرعه رجعت للفندق اذا كان يجوز ان نسميه فندق واعطش قلت بروح اشتري من المتجر حلوة متجر صح يعين من البقالة عصير وموية وادخل وزي العادة يحسبوني ميكسيكي قام البياع يرطن معي مكسيكي قلت له ماني مكسيكي قال اجل ايش ايراني قلت ولا ايراني قال من وين قلت سعودي عربي وابتلشت طلع البياع يمني وقام يسالني انت ابوك مليونير قلت لا ليه قا ل كيف جيت هنا قلت له على حساب الحكومة قال يعني ابوك ماهو مليونير قلت لاوالله قال غريبة مايجي هنا الا اللي ابوه مليونير قلت كم حسابك وحاسبته قال كلنا عرب قلت اكيد مافيها شك قال بس ابوك ماهو مليونير المهم رجعت للفندق وانا هناك قلت باطلع شوي عند الباب وانا عند الباب مرت عبده حولي ناظرت فيها شوي وبعدين ناظرت للجهة الثانية صدق اذا قالوا جتك ام العبيد وقفت عند راسي وقامت تصرخ علي وتشتمني وتقول كلام مافهمت منه ولا شي خفت ارد عليها يطلع حبيبها من العيال اللي جالسين في الجهة الثانية نطيت لفنق ودخلته وجلست اناظر فيها من ورى الباب الزجاجي احر يوم في سان فرانسسيكو وعلى ان المدينه كلها شاذييين الا اني قررت ازور حي كاسبر اشهر حي للشذوذ هناك ومعي سلاحي قصدي كاميرتي ووصلت هناك الا شي يحوم الكبد من قلب المكتبات فيها كتب عن الشذوذ محلات الفيديو افلام شذوذ النوادي الليلية قرف محلات التصوير صورتسد النفس حتى الكنيسة للشاذيين المهم وانا هناك وقفت عند محل فيديو مسكر وقدامي عمال حفريات جلست اصور المحل بالكاميرا واتريق عليه مع عمال الحفريات ومادريت الا برجال شده يناظر فيني ويدخل افلام من تحت الباب للفيديو واخوكم من يوم شافه وصلعته طحت ضحك الرجال قام يناظر فيني ومعصب بس علشاني ولد شايفين كيف علشاني ولد ما سوا لي شي المهم رجعت للفندق كانت طيارتي الى لوس انجلوس الساعه 6 وبيني وبينكم زهقت يعني لفيت سان فرانسسيكو طلبت توصيله للمطار الساعة 2ونص مبكر جدا مو كذا قلت فرصة نتمشى مع التاكسي فيما يدور زباين ثانيين(توصيلة او شافل معناها تاكسي لاكثر من نفر في وقت واحد بس يارايحين من نفس المكان او العكس) المهم قلت على الاقل ساعه بالسيارة ابدا 5 دقايق ركب اخر زبون و5 دقايق واحنا بالمطار قلت عسى صالتي اخر صالة ابدا تونا داخلين للمطار لف وقال هذي صالة خطوط الكونتيننتال ناظرت ساعتي الا هي 3 الا عشر والرحلة الساعه 6 يعني 3 ساعات زهق رحت للكاونتر باقص صعود قال لي الموظف الرحلة اجلت الى الساعة 9 بس تبي الان في رحلة الى لوس انجلوس يعني الساعة 3 الا خمس بس اركض لان بوابتها هناك وش رايكم هذا تسمونه حظ ولالا المهم رجعت لديرتي لوس انجلوس بصراحة لوس انجلوس حلوة وتهبل بس المشكلة الوحيده هي انهم يحسبوني مكسيكي مدري ليه مرة نزلت للداون تاون للسوق هناك وكل ماجيت اشتري رطنوا معي لاتيني واذا حكيت انجليزي زعلوا يعني ليه تتبرا من اصلك مرة دخلت عند محل فيه 3 بنات مكسيكيات شابات مو حلوات بس لابسات ملابس اغراء رطنوا معي مكسيكي رديت عليهم بالانجليزي واحدة منهم حسبتني ولد نعمة ومتبري من اصلي قامت تسوي لي حركات غريبة وتتلوى وتنحني قدامي المهم الله يستر على كل الولايا في محل ثاني فيه عجوز مكسيكية بغت تطقني أي والله بغت تطقني تكلمني مكسيكي حلفت لها بالله اني سعودي ولاني مكسيكي وجت بنتها وولدها وكلموني وعرفوا اني مو مكسيكي لكن هي ابدا وعصبت علي وقامت تهاوشني بيني وبينكم شككوني بروحي يعني انا اللي صح وسوق مليان عريض فيه مالايقل عن (10000)شخص هم غلط البلية اسم ابوي ناصر فيه ريحة مكسيكي ماعلينا تصير تصير المهم يعني صارت ائفشات حلوة في لوس انجلوس مو مرة تستاهل الذكر الا اذا كنتوا ملزمين اووووه ملزمين مثل في هوليوود كنت امشي في الطريق الرئيسي اللي فيه بصمات النجوم واخوكم على خبركم راعي فزعه مايقصر شفت البنات متجمعين حول بلاطة توم كروز ويصورون جنبها اللي منسدحة جنب اسمه واللي تحب البلاطة يعني على بالي احب توم كروز اللي ماكنت اعرف انه ممثل اصلا باصور معه والمشكلة كنت بروحي وش اسوي وش اسوي قمت ابعدت متر عن البلاطة ومديت رجلي وكنت لابس وقتها صندل المهم مادي رجلي على الاخر بحيث صارت رجلي جنب اسم المحروس توم كروز واصور رجلي الشي اللي يقهر ماطلع في الصورة الا اصبع رجلي الكبير ولا طلع اسم توم كروز البنات اللي ضحكت واللي صفقت لي يعني الواحد يعرف يستخدم عقله ومرة في اوتوبيس وراجع الساعه 10 ونص وكنا مارين قرب الداون تاون الاتوبيس يخوف وكل شي يطيح القلب احترت وش اسوي مالقيت الا حل واحد طقيت النظارة الشمسية والكاب نزلته كاني من افراد العصابة وكان جنبي عبد اسود جثة الغريب انه ماناظر فيني ولا نظرة وعيوني من تحت النظارة الشمسية يتدودلن من جهة لجهة ودقات قلبي صايرة زي فرقة حسب الله ومرة وانا داخل سينما وكنت داخل السينما للمرة الالف ومعي فشار بروح لدورة المياة وشغلي الشاغل وين احط الفشار دخلت لقيت جنب المغاسل طاولة انبسطت حطيت لافشار وماسمعت الا ذيك الصرخة هيييي وات ار يو دوينج هير بالغلط داخل دورة مياة للنساء طلعت ونسيت الفشار يعني استحيت على دمي وتذكرت الفشار وش اسوي ياربي وش اسوي دخلت مرة ثانية وانا معطيهم ظهري ومديت يدي على الطاولة وخذيت فشاري ومرة وبما اني احب اكل وامشي بروحي كنت في المول يعني السوق اتغدى وكنت على الطاولة بروحي وشنطتي تحت الطاولة رحت اغسل لقيت على الطاولة اربع بنات جالسات وقفت افكر كيف اتكلم معهم مادريت الا الشباب السعوديين على الاماراتيين كانوا توهم اقبلوا بيتغدون حسبوني باغازل وخذوا عندكم تصفير وايه ياعبدالعزيز واللي يقول يامعود اهل الرياض يغازلون بالجملة انا انحرجت صح مايلبق علي ثوب الحيا المهم البنات ناظروا فيني قالوا لي اجلس يحسبوني ابي اجلس معهم والشباب قالوا حبوك حبوك المشكلة الوضع صار اعقد يعني بامد يدي تحتهم علشان اجيب شنطتي وعينكم ماتشوف الا النور صرت روميو على غفلة جا شايب مع عجزته ويناظرون فيني يقولون لي كمون مان دونت بي شاي يعين لاتستحي المهم سميت بالله واخذيت شنطتي ومشيت واصاب كل اللي في السوق احباط…

المهم كانت تمر الليالي الملاح في لوس انجلوس بزينها وشينها الى ان وصلت الى اخر ويك اند لي هناك لان الويك اند اللي بعده باسافر لواشنطن ثم الى الرياض المهم وين اروح ووش اسوي مافي الا سان دياجو فله وسعة صدر وفعلا ماكذبت خبر هالمرة رحت بالقطار لسان دياجو طول الرحلة بالقطار كانت الرحلة هادية ولافيها اشياء مزعجة الا انها طويلة وزي العادة ماعرف انوم في القطارات ولا الطيارة وصلت سان دياجو وكنت قد حجزت في فندق عن طريق مجلة للسفر والسياحة اللي اخبره ان الفندق على كلامهم انهم قريبين من وسط سان دياجو ولان الواحد دايما يتعلم من غلطاته تاكدت وكان همي الوحيد انه مايكون في الداون تاون وفعلا كان كذالك كان على طرف المدينة عفوا مو الطرف طرف الطرف كان بيننا وبين الحدود المكسيكية مالايزيد عن 10 كلم منطقه في آخر الليل واول النهار تنزحم بالمكسيكين المهم ماعلينا ولابيهمني ابد منهم أي يعني اكون حلوة في عينهم احم احم عفوا وش قمت اخربط على ماوصلت سان دياجو وبعدين فندقي الا الدنيا ليلت في سان دياجو يعني بالعربي راح اليوم كله عادي تذكرت سلامة العبدالله يوم يقول مضينا بعزم يفل الحديد وصلت للفندق قصدي الموتيل شي نظيف وحلو ومليان عوايل بتسافر اما للمكسيك او العكس المهم بما ان الاجواء مكسيكية فحول الفندق مطاعم منها تومي وبيتزاهت وتاكو بيل فقلت الواحد يندمج في الاجواء رحت لتاكو بيل لاول مرة في حياتي ماقد جربته هنا في المملكة والجوع طاقني بقوة وبابتسامة كبيرة طلبت 2 سندويتش تاكو بيل وبعدها رحت لللسوبر ماركت شريت بسكوويت ومووية المهم وصلت لفندقي وشغلت تلفزيوني وطلعت التاكو و وش هو من تاكو انا اول ماطلعتهم حسبتهم عينات ولادعاية لنوع جديد المهم جلست اقلب في هالكيسة وين السندويتشات في الاخير مرة تاكدت ان هذا هو المدعو تاكو الله وكيلكم السندوتش الاول كلته في لقمتين اما الثانية فسويت به سواة البنادول بلعته ثم شربت عليه موية وتحمدت الله اني شاري بسكويت وجلست اكل ثاني يوم الصبح من النجمه رحت الى sea worldوقضيت هناك يوم من احلى ايام عمري صدق مكان روعه حلاته انك تقضي فيه يوم كامل المهم رجعت الى فندقي وهنا بدات الكوارث, التروولي اللي بيوديني الى فندقي امتلى عبنده كويحات ومكسيكين وخبري اني كنت جالس على الكرسي اخر خبري اني واقف ولا اقدر اتنفس من الزحمة المهم وصلت الساعة 1ص والجوع لاعب فيني لعب وكنت حالف الف يمين مهما يكون ما اشتري من المدعو تاكو بيل مهما جرى ورحت كاي شاب وسيم لقيت مطعم تومي مسكر ضحكت قلت هين عندنا بيتزاهت وتوني رايح لهناك الا وبيتزاهت يقفلون جلست اركض كالمشرد لهم والولد اللي يشتغل هناك كان يقفل وانا اقول له بليز 5 منت اني بيتزا اني سانتوتش اني سلاد وجالس اطلع فلوسي حسيت انه يقول في نفسه وش هالخبل المهم جلس يطالع في مديره قال له المدير لا واشروا لي مر بكرة ايه هين طيب وش اسوي باليوم طبعا عرفتم البقية رجعت للسيد تاكو هيل (بيل) وطلبت هالمرة اربعة سندويتشات وطلعت ومريت بالسوبرماركت وقلت لنفسي اشتري موية ولا لا ولان العجز ولد عم ابليس تذكرت ان الموية اللي عندي مليانة ماشربت امس الليل الا كاسين وفي الفندق ماكينة ثلج ورجعت للفندق وبلعت اقراص التاكو هيل وهنا المفاجاة الكبرى نسيت اني شربت الصبح 3 اكواب مويه يعني العلبة مافيها الا كوب واحد والساعه 2 الفجر يعني مشوا خشمكم اطلع مرة ثانية قلت كاس يالله كاس كانني في رمضان وتوني باشرب هالكاس الا من رداة الحظ وينكب على الارض بس كملت كملت وش اسوي ذبحني العطش والساعة 2 الفجر يعني مافي امل اطلع و بعدين العطش ذبحني صوتي صار زي صوت سعد جمعه يعني وضع مايطاق قلت لنفسي مابدهاش بروح اجيب لنفسي مويه وتوني باطلع من الموتيل او الفندق الا واسمع نبح كلاب مشيت وقلت ولو ..وتوني باكمل واسمع سيارات شرطة مسرعة وتفحيط وسيارة شرطة تلاحق سيارة قلت لا عاد بدهاش ومية بدهاش الواحد يجلس في الامان اصرف له وش اسوي وش اسوي طنت في راسي فكرة لقيت عندي صحن كبير حاطينه لي في الغرفة رحت خذيته وغسلته ورحت لماكينة الثلج واعبييه على اخره ثلج ولحسن الحظ ماكنت رميت قارورة الموية واقوم اكسر الثلج بيدي واحطة في القارورة وبعدين ارج القارورة يعني ابي اصلح لنفسي موية جلست على هالحال ساعة الا ربع تقريبا تذكرت فيها اللي يصنعون خمور في السعودية والخليج اذا طلعوهم في الجريدة كل واحد بقدرة المهم بعد هالمجهود الخارق صلحت لنفسي كاسين موية ونمت في امان الله صحيت اليوم الثاني شريت لنفسي جالون موية 2ليتر ونص ورحت لحديقة الحيوان ابي اشوف عمتي الباندا رحت هناك وساعتين على ما ادل وينها فيه ورحت لبيتها ولاتنزلت عمتي تطلع لنا ذاك اليوم وسئلت المدربة قالت مالها مزاج يعني متكدرة قلت يازين هالباندا في سوق الحمام وبالنعل اجل باندا حاطين لها مكيفين صحراويين وركبت التلفريك حق الحديقة وياشينها من لحظات البرد يصفق بي ومع ذالك جسمي معرق والعرق يتناثر من كل جهة والواحد فيه من الخوف متجمد في مكانه ماصدقت على الله نزلت وطلعت من الحديقة وهنا حسب جدول القطارات القطار اللي بيرجعني الى لوس انجلوس ينطلق الساعه 5 ونص المهم وش اسوي والساعه الان 2 ونص الظهر قلت بروح للكورنيش قروي صح قصدي بروح للشاطئ وفعلا توني بروح مدري وش اللي قال لي وقف عند محطة القطار وتاكد من الموعد توني واصل باسئل بس أي رصيف قطار لوس انجلوس الا ويؤشر لي الموظف هذاك هو الحقه ضحكت قلت شكله مسطل واروح اسئل واحد ثاني قال هذا هو الحقه قلت ياناس ياعالم الجدول معي المهم رحت للقطار واسئل المضيف حقة يعني حق التذاكر هذا اللي يودي الى لوس انجلوس ماكملت حكيي الا قال ايه ويشد يدي لان هذا اخر قطار يوم الاحد غريبة صح واقرا الجدول اثري كنت عاكسه يعين الوصول الى سان دياجو من لوس انجلوس الساعه 5 ونص المهم جلست ادور مكان ادور ادور القطار اصلا فاضي بس ادور رطوبة يعني بنات واشوف بنتين واجلس وراهم وطول الرحلة مابقى احد الاوغازل البنتين من حق التذاكر الى شباب القطار وحتى الشياب واخوكم جالس بادبه الى ان التفتت علي بنت وقالت معك جدول الرحلات قلت ايه قالت لو سمحت متى القطار يوصل مدينة………اخوكم راح يلف الجدول من اوله لاخره ومالقيت المدينه استحيت على دمي عطيتها الجدول وطلعت المدينة في اقل من دقيقة اثري من اللخمة حاط اصبعي طول الوقت على المدينة اللي يبونها …المهم وصلنا بسلامة الله وحفظة وكملت ايامي في لوس انجلوس الى يوم رجعتي للسعودية بسبب من الحاح الشهامى الخطوط السعودية اني قبل 3 ساعات من رحلة الرياض اكون قصيت بوردينج بكرت رحلتي الى واشنطن وجلست في مطار واشنطن مالايقل عن 18 ساعه وصلت مطار واشنطن الساعه 11 ونص مساءا ومثل ماقلت لكم ان المطار صغير وكل شي يسكر فيه عدى محل البقالة حتى الانوار ولاني ماعندي وقت اروح لفندق جلست بشنطي وعربيتي كاني هوم ليس homelesssمن الساعه 11 ونص الى الساعه 8 ص يعني وقت مافتح كاونتر السعودية قصيت بوردينج وحطيت الشنط وبما ان الرحلة الساعه 6 مساءا المهم وش اسوي وش اسوي اقرب تاكسي والى البيت الابيض وصلت هناك طابور طويل عالم وناس وزحمة يعني مافي امل ادخله قلت بالف عليه واصوره معي فيلم كامل ماراح منه الا صورتين يعني لازم احلله وبينما اتجول هكذا الا وش جنديين ومعهم كلب لا لا لا يروح فكركم بعيد ماقالوا لي شي بالعكس ابتسموا لي قلت لهم ممكن اصوركم ابتسم الجندي وقال احنا لا الكلب ايه قلت كلب كلب عاااادي وابعد 3 امتار واعد ون تو ثري تشيز واطق الكاميرا والفلاش ومادريت الا الكلب صار اسد وينط علي ذيك النطة ماصار بيني وبينه الا 1 سنتيمتر الا ويجره الجندي من سلسلته وتعالوا شوفوني انهارت قواي من الروعه كرهت البيت الابيض وواشنطن ورجعت للمطار مابقى الا هي كلب بوليسي يتحرش بي فرامة مولينكس اهون علي جات الرحلة وزي العادة السعودية ماتقصر كل الرحلات ينادون عليهم بادب وعن طريق المايكروفون الداخلي الا احنا طلعوا مايكروفون العروس من تحت الطاولة وعلى طول العوايل على اليمين والشباب على اليسار العوايل اول ومن هاللخبطة واللي ماله مقعد واللي مفرقين بينه وبين زوجته في الكراسي المهم صعدنا للطيارة ومن حظي جنبي بنت من جدة وصاير اخوكم ثقل يعني ما همتني المهم وتتاخر الرحلة طلعت البنت كيسة حلاو فواكة واطلع لها كيسة شوكولاته تطلع كتاب تقراه اطلع لها 6 جرايد واربع مجلات المهم قالت عن اذنك ممكن هالجريدة واخوكم انطلق زي الحصان في سباق الجرايد والحلاو اللي تبين بس وتعرفنا وجلسنا نسولف وساعتين وناموا الركاب الا انا وهي لاتفكرون كذا ياناس عيب والله قالت عن اذنك بانام انا بعد وشووي وتتقلب ولاجاها نوم وتصحى واخوكم جاهز تلعبين اكس او معي قالت ليه لا حلو وكملنا لعب اكس او ومربعات وشوي قالت انت ماراح تنام قلت لها لا اصلاا انا ما اعرف انام في الطيارات ابدا قالت ليه كذا وايش فيك وانا خاش جو على بالي شوي شوي وقامت البنت تحلطم ياليتني جبت المنوم معي وقالت هالمرة لازم انام باي طريقة قلت يعني خلاص مافي لعب قالت لا لازم انام قلت طيب وهنا انقطع البث وبعد 3 ساعات وانا اتمغط التفت عليها قالت لي البنت سيدي يا سيدي قال ايش مابينام في الطيارة قلت لها ببراءة الباندا انا نمت قالت بس نوم انا كان نفسي اصحيك بس ماهونت علي اثر البنت مانامت وانا اللي نمت ههههههههه والله كل ماتذكرتها اطيح على نفسي من الضحك ياحليلها والله المهم ياسادة ياكرام وهكذا انتهت مذكرات شاب سعودي في امريكا ويقول لكم في الاخير استروا على ماواجهتم وشكرا لكم

تحياتي بلاك هورس

تاريخ كتابة القصة عام 2002م / 1422هـ

جميع قصص بلاك هورس خاصة بموقع قصص قصيمي نت والحقوق محفوظة

error: Content is protected !!