يا ناشدن عني في قريحة الشعراء
يا ناشد عني في قريحة الشعراء يكثر استهلال المطلع يا ناشدن عني في كثير من قصائد الشعراء والبيت واضح انه جواب عن حال الشاعر التي يصورها في أبيات قصيدته وسبق لنا عرض صدر البيت الذي يقول ( يالله ياللي من ترجاك ماخاب ) في مطالع قصائدهم على هذا الرابط واليوم نستعرض يا ناشد عني حيث تزخر ساحة الشعر بالعديد من القصائد التي فيها هذا المطلع ولعل اشهر قصيدة ورد فيها يا ناشدن عني هي قصيدة الفارس والشاعر شليويح بن ماعز العطاوي العتيبي ويقول فيها يامل قلبٍ عانق الفطر الفيح كنه على كيرانهن محزومي ما أخلف وعدهن كود ما تخلف الريح وإلا يشد الضلع ضلع البقومي يا ناشدٍ عني تراني شليويح نفسي على قطع الخرايم عزومي إن قلّت الوزنه وربعي مشافيح أخلى الوزنه لربعي واشومي واليا رزقنا الله بذود المصاليح يصير قسمي من خيار القسومي واضوي اليا صكت عليّ النوابيح واللي قعد عند الركاب مخدومي وإن كان لحقوا مبعدين المصابيح معهم من الحاضر سواة الغيومي اليا ضربت السابق أم اللواليح كلٍ رفع يمناه للمنع يومي أما الشاعر فيصل بن منصور البقمي الرياحي فيقول يا ناشدن عني تراني حدا اثنين اما جليس اكرام والا خلاوي ماني من الشله هل المذهب الشين اللي يمصون الشيش بالقهاوي اعوذ بالله من اخوان الشياطين والوذ بالباري جويد العرواي ياهازم الاحزاب ياناصر الدين ياخير من يدعى لكل الدعاوي انا دخيلك يوم نصب الموازين وانا بوجهك عن جميع السأوي عساك يخلاق الانسان من طين تفزع لنا يوم المحن والبلاوي العمر مهما ياخذ ايام وسنين يطويه بين اليوم والليل طاوي يالادمي لو طال عمرك على وين لابد من يومن على القبر ضاوي افطن ترا دنياك لعبة وراعين لو مدحوها بالامل والمناوي ترميك تياراتها يسار ويمين ولا انت بعليها لو تقاويت قاوي ان جنبتك امواجها والبراكين ماجنبتك اهمومها والشكاوي أقفت بـ روس الأنبياء والسلاطين لاجاملت معهم ولاهيب تاوي تضرب بسيف وخشم خنجر وسكين فوق الكبود الغافله والكلاوي من يومها تطبخ وتاكل ملايين تمشي وتحد الناب والبطن خاوي قانونها يغلب جميع القوانين وهقواتها تغلب جميع الهقاوي اما الشاعر عبدالعزيز بن راشد بن سدحان الفريدي الحربي فيقول يانـاشد ٍ عني تسرك علومي انا بـفـضل الله بـخير من الله مقصر ومذنب واصلي واصومي وازل واستـغفر على كل زله واقوم في وقت اللزوم بلزومي واشوم عن هرج ٍ مهو في محله واحب فعل الطيب من عرض قومي واكره دروب المسكنه والمذله واحفـظ تقاليـدي واراعي سلومي وابعد عن المنقود دقه وجله ولا اواطن مصاحب عيال الرخومي اللي تناشبني على كل زله واتـوق للبطران نسل القرومي اللي لارحت بطرقة ٍ ما تمله واقنع بمقسومي ولا يزيد لومي لاشك كل ٍ رزقه مقدر ٍ له وان مت ماني ميت ٍ قبل يومي وان عشت ماني عايش العمر كله ما خلد اللي من خطـاه معصومي وقدامـنا دار ٍ نبي ننتقل له يربح به اللي بأمر ربه يقومي اللي فعول الخير تملا سـجله والا ترى الدنيا مجرد حلومي اجمع شريط العمر وارجع وفله نركض ورى الدنيا ونركض ونومي والحاصله كل ٍ يراوح محله يا الادمي مهمـا تحوش محرومي كن الزمان يقـول ما اخذت خله خيرك لو انك دمت له ما يـدومي وان دام خيرك مانته بدايم ٍ له اما الأمير بندر بن سلطان بن عبدالعزيز في قصيدته «شبيه السيف» التي كتبها في خادم الحرمين الشريفين الملك سلمان بن عبدالعزيز ومنها يقول يا ناشد عني أنا بخير وأبشرك أنا جبل راسي ولا تهزه أرياح أنا شبيه السيف الأجرب وأخبرك في يدين سلمان معه وين ما راح يا أبو فهد يا تاج راسي وذاخرك لك منزلة في القلب ولا ني بمداح لك يا ملكنا العهد والله ينصرك وكل شعبك رافع الراس مرتاح وحقك علينا يا وطنا نعمرك ولا نفكر في المناصب والأرباح اما الشاعر فهد المبدل فيقول ياناشدٍ عني علومي طويله أبختصرها لك ببعض الرسائل إمنيله تسعة وتسعين نيله الحظ مايل والرفيق إمتمايل وزود على الحمى يزود المليله وصابر ومتحمل وساكت وشايل ياكثر شيٍ وسط قلبي أشيله بأموت بأسبابه ولانيب قايل الصمت في بعض المواقف فضيله والجرح له في كل قلب دلايل حاولت لكن ما قدرت أستميله الشوق عمره ما يجي بالتحايل ما عاد من غاية ولا من وسيله جربت في حبه جميع الوسايل ما منه لا فكه ولا فيه حيله عمايله بالقلب ياهي عمايل الناس واجد والمشاعر قليله يا قل ما نلقى وراهم حصايل والعمر يركض والزمان يحدي له والحب يبقى والاوادم رحايل شكواي للي كلنا نشتكيله من شاف ما شفنا شاف الهوايل ومن ذاق ما ذقناه يا عزتيله يشوف بعيونه نجوم القوايل الصاحب اللي شايله للثقيله ثقلت عليه يرد حتى الرسايل ما عاد حضنٍ دافيٍ نشتكي له يا حسرة أحلام السنين الأوايل أحلى الليالي الغاليه والجميله ضاعت مثل دمعٍ على الخد سايل واللي يضيّع من لياليه ليله يضيع مثل الدم بين القبايل اما الشاعر عيد غازي الرشيدي فيقول ياناشدن عني ترى القلب مفجوع والحال اقشر والحبايب نسوني أقوم وأرقد وآخذ شوي واقوم وأقول معقوله مشوا وأتركوني مرات أحس أني من الشوق مدفوع ومرات اقول اللي يبوني يجوني ومرات أحس أني عن الارض مرفوع ومرات أحس الارض فوقي ودوني الجوع كافر واللي أكفر من الجوع إفراق من راحوا ولا ودعوني ياما عليهم هلت عيوني دموع وياما خذوا مني وفا وما عطوني عزاه يادمع تحدر من الكوع من يوم ما ناديتهم وأحقروني ناديتهم يا فلان والصوت مسموع واقفوا ولاكنه حصل وأعرفوني ياقمر ليلي ليل وهمومي شموع بنيت لهمومي وطن وأسكنوني ماعاد لي في دفتر الوصل موضوع حفرت لأحزاني قبر وادفنوني اما الشاعر متعب الغيداني فيقول يا ناشدن عني تراني لحـالي لا هـي بنفسيه ولا قل جـلاس اللي عرفته من دروس الليـالي لا تصفي الدنيا ولا تصفي الناس اما الشاعر حشر بن متروك المقاطي العتيبي فيقول ياناشدن عني من ايات الاقطار أنا عتيبي نجد مركز عموده أنا من الهيلا طويلين الاشبار قومٍ على طيب الفعول محسوده حنا عتابه نكرم الضيف والجار ونارد على حياض المنايا ونروده حنا هوازان يوم بارودها ثار اليادارت الهيجا حنا اسوده ترعى بنا الفطر مخيفات الاقفار إليا اكتبر عشين خوايا عضوده اما الشاعر الرثيع حسين المطيري فيقول ياناشـدن عنـي تـرانـي شمـالـي بالقاره اللي بيـن جـدلا ومسعـود البـال رايـق والسحـاب امتتالـي والطير انا ويـاه طـارد ومطـرود اشري وناسة خاطري فـي حلالـي ولاحدن يحاسني عنالنقص والزود خسرت والا جيت فـي راس مالـي مال العرب عندي مواثيـق وعهـود كود أنت ياللـي ماتفـارق خيالـي مثل النفس يفضابك الصدر وتعـود ودعتـك الله ياحسيـن الـدلالـي ماينفقـد عبـدن تـولاه معبـود كانه هبال ابا عتـرف فـي هبالـي وقول أنا كلـي سلاطيـن وجنـود وأسجع بك القمرا على عـز والـي وتوقف الاشجـار وتغنـي النـود كنـك تهزّع بالجدايـل اقبـالـي وتعج بالريحـان والمسـك والعـود هـذي طـراة الـروح ياهمـلالـي ياللي عسى مالك يحدك على الكـود وتغيب شمسك ماصرفـت الريالـي لافارج ٍ كربـه ولا انتـه بمفقـود اما الشاعر محمد ساير الخالدي فيقول ياناشدن عني تراني خبر خير الجيب فاضي والديون تحديني يرزقني اللي يرزق العش والطير ما توصد الأبواب بينه وبيني ماني من اللي يعبدون الدنانير بأموت ما وطيت لاحد جبيني عند الكرامة ما تفيد المعاذير ياما صملت وجملتني يميني أصدّها وأغير وأصد وأغير راسي على القمة وعزمي عويني والليل وأحباب الجفا والمقادير ما فيهم اللي لا عوى لد فيني محشوم يا دمعي ولا منك تقصير كبرتني قدام من يحتريني هليت من عيني نشاما طوابير خايف مع الأيام لاهل عيني اما الشاعر فواز صياح العماش فيقول ياناشدن عني تراني تعديـت جسرٍ يؤدي لـ اختـلاف الطبيعـه جسرٍ ليا منـي فهقتـه تلهيـت عن الهمـوم القاسيـات المريعـه اما الشاعر ابراهيم الصوفي فيقول ياناشدن عني بلا فــــخر صـــــوفي نجمن شلع راعاه من يدرك الـشوف ولامن وعــــدنا بالطويلات نــــــوفي ونمدها جـــــزله بها الطيب مـردوف حمايت الخفرات يـــــــوم الـصفوفي يوم القبل مــــــايعرفو طاري الـخوف يومن ضعيف الـــقلب نفسه تزوفي صـــغيرنا يقلط لا سار به الـــــحوف اما الشاعر عبدالعزيز بن غشام الجناحي الخالدي فيقول يا ناشدٍ عني ليا صرت نشاد عن اصل القبيله جاك ردي على هونه انا من بني خالد جناحي عريب اجداد وربعي على حوض المنيات يردونه ولي عزوة العليا وتشهد لنا الاشهاد على فعولنا في العصر الاول ومن دونه حمينا ترى بيض الحباري من الحساد بعد ما وخذ ،ربعي لعشه يردونه وانا من رجال الشعر والعز والامجاد وانا من بني خالد وخالد تعرفونه هو الفارس الي حارب الفرس والاكراد مع الجمع الاول كل موج يخوضونه وهو سيف ربي سله الله على الجحاد والى قاد حربه صارت الناس مجنونه ولاهو كما الفريس عنتر ولد شداد يقود المعارك مير نيته ملعونه ولاشك حرب بالصحابه علم وجهاد علشان دين الله في الارض يعلونه ولي الحق بافخر به من الجد والاحفاد مدحه الرسول وكلمة الحق مصيونه اما الشاعر ممدوح بن سعود فيقول ياناشدن عني عسى نشدتك خير لاصرت ماتدري بـ غاية مرادي انا المهلهل وانت وليّم شكسبير والكل منّا هايمً وسط وادي والفرق واضح فالفعل والتعابير يامضيّعن وجهتك وين انت غادي الله يسلمني صدوف المقادير اللي نتايجها بـ كبوة جوادي ابخير لو اني ماني والله ابخير حال السهر بيني وبين الرقادي متحيّر ومتشتت الفكر و أسير كني سجينن وسط سجن انفرادي لاتنخدع مثلي فـ معرفتك الغير وايغرك النسناس والجو هادي اللي بدايتهم محبه وتقدير اغلبهم اللي فالحقيقه امعادي وش باقيٍ بيصير ياقلب وايصير اتمرني الصدمات واقول عادي الحلم خالفني معى مفرق السير واتعبتني يوم انك عادك تنادي ودي لكن عيّت علي المقادير يالله بصبرٍ مثل صبر المهادي اما الشاعر ولد أمس – ذعار بن قاعد الفريدي الحربي فيقول ياناشدن عني ترانـي جهـادي بأم السلم ما بين بحـرة وجـدة فضي بال وعندي الجوّ هـادي ومصد مع هاك الوجيه المصدة مصد عن درب السنع والقوادي خذ موجزي وإلا السوالف مسدة اما الشاعر محمد العتيبي فيقول كامنية شاب ياناشدن عني تراني من بقيق في وسط فله بس ساكن لحالي ودي بزوجه بس ماتنشف الريق فيها من الاخلاق وفيها جمالي ومنحاش عن عوب البنات المطافيق لا يطبخن مرقوق وفيهن هبالي الوحّده كن شكلها طير غرنوق مضيعات البيت وحسن الدلالي اما الشاعر علي حسين الحويطي فيقول ياناشدن عني من الصبر مليت فضلت صمتي وألتزمت السكوتي يابو عيون وساع لا منك اغضيت باهدابها تكتب حياتي وموتي لا شفتكم لونك على البعد مريت ما اقوى ألتفت كني بوضع الثبوتي افرح الين اقبلت وازعل الى اقفيت واصمت ولون القلبِ ماهو صموتي بعد الموده ليه يازينِ صديت وانا انتظر وأيام عمري تفوتي ياما على شانك صبرت اوتحريت شربي من النسماتِ والصبر قوتي ياما على شانك من الشعرِ غنيت لما نحلت الحال وانبح صوتي اما الشاعر صالح عبدالرحمن الناصر الصالح فيقول يا ناشدٍ نشدتك فيها وفيها مانيب أجاوب نشدةٍ من وراها أمور والدنيا غثى من يبيها اللي يعرف أبعادها ما بغاها دنياً كفى الله شرّها ما عليها تضحك بحال وحال يطحن رحاها هذا البلا ضحكاتها يقتفيها ساعات والخافي وراها وراها والجاهل اللي ناوي يشتريها بلاه يجهل طيبها من رداها كم واحدٍ وثق يديه بيديها وأصبح رهينه تحت فيّة عصاها مالت عليه وعافها ما يبيها حس بمرارتها وفارق حلاها وأمسى يحسب حجة قد نسيها كله من أسباب النفوس وهواها لكن ياللي نيتك منتويها حكّم ضميرك والهجوم بسماها ترى الدروب إثنين وإختر حديها والزين غير الشين واضح خفاها هذي نماذج والنصيحة تليها يا شاري الدنيا رصيدك غثاها معاني تمت وذي نبتديها الشعر له غاية بعيدٍ مداها أتعب لها فكري وأنا مهتويها وأصوغها واللي يبيها لقاها الرجل دايم كلمته يحتميها ولا خير ياللّي كلمته ما حماها أفكارنا كيف الضعوف تغزيها ياللي علومك عالي مستواها معنى القصيدة تم للي يعيها قصيدةٍ والمعرفة مبتداها أهديتها واللي يبي يقتنيها يسمع براسه كل ساعة صداها والناس كلٍ ساعته يحتريها وتجيه لو هو ناسي ما احتراها ويقول شاعر ياناشدن عني تقول انت وشفيك؟ تعال وانت تشاهدالوضع معدوم ياناشدن عني تسرك لياليك وانا ليالي اضلمت مابها نجوم ياناشدن عني تجرك خطاويك للراحة اللي منّها انااليوم محروم ياناشدن عني تحقق امانيك واعيش انا في واقعن كله حلوم ياناشدن عني ترى الحال يبكيك عايش بدنيا كلها احزان واهموم ياناشدن عني علي تصفق ايديك لوشفت حالي تنحرم لذت النوم وياناشدن عني يجي من يعزيك بافضع خبر باكر يقولون مرحوم ويقول شاعر ياناشدن عن حالتي حالتي حال خله على الله بين هم وعله الحال حل بداخل الحال ولوال مابين غار ونار والفئ ملـه الحال حل بداخله رجف زلزال هز الظلوع الراسيه من محله العدل ظلم ليا تأخر وياطال مثل الصبر يحسب ليا زاد ذله وأقوال مايتبع صدها بالافعال قولة (كلام رجال) صارت ممله وان قلتلي هل أنت تؤمن بالامثال؟ أقول لك يا طيب القلب لله ما أقول لك ماعاد باقي به ارجال اقول هذا واقع الحال كلـــه وياصاحبي وان كان تنشد عن الحال الحال حاله بس خله على اللّه الوضع باقي لاتغير ولا زال مشاكلٍ ياصاح ربك يحله اما الشاعر صالح الديحاني فيقول ياناشد عن حالتي وشتبي بي لاصار لافازع ولامبديٍ راي الناس عارفتٍ ردايه وطيبي لاخففو همي ولا كفو بكاي ويقول شاعر ياناشدن عنّي وأنا عنك منحاش ادخل على الله لاتشوفگ عيوني من لايقدّم نيّة الخير ما عاش يمسي حزين بـوحدته ومغبوني كلن ومعروفه وطيبه وما حاش بيتٍ يخلّـد لي .. ويشفـي غبوني ) دامگ قليل العرف للود غشّاش لو أنت راسي ما تشيلك متوني ويقول شاعر ياناشدن عن حالتي حالة الشين الروح راحت والمعاذير باحت الحب مثل الخيمه ام العمودين اﻻ انسحب حدى العمودين طاحت ويقول شاعر ابشرك يا ناشد عن حالتي مبسوط لو ان الزمن قاسي والأيام حواجه على كل حال الوقت مالي عليه شروط نماشيه ونسایـر بـلاويـه وازعاجـه ليا زان خذنا في مجال المراجل شوط ولا شان ما شنا لـو اتمسنا الحاجـه نحب الجمايل والكرم لو علينا ضغوط ونصبر على شدات الأيـام ونـواجـه وعلى سبيل الفخر يقول الشاعر ابراهيم خلف الزراقي العتيبي يـانـاشــدن عــنــا تــرانـــا الــزراريـــق عــيــال روق وعــزنــا فـــــي عـتـيـبــه الله عـطـانــا الــعــز بــيــن الـمـخـالـيـق وهاذي على اهل العرف ماهي غريبه تاريخـنـا ثـابـت كـمــا الـنـيـر وطـويــق وسهـومـنـا يـــوم الـحـرايــب عـطـيـبـه احـــرار مـانـعـرف شـبــاك المسـابـيـق ولاقـــد دفـعـنـا لـجــل نـبـقـى ضـريـبــه تـشـهـد لـنــا الــحــره كــــلامٍ بـتـوثـيـق دار الـرجــال الـــي حـمـوهـا غصـيـبـه منزحـيـن الـخـصـم مـــن دون تـبـريـق ومـفـرقـيـن جــمـــوع قـــــومٍ حـريــبــه يــوم الـعـرب مـالـوا وراحــوا تفـاريـق حـــنـــا ثـبـتــنــا فــالــديــار الـمـهـيــبــه مـاهـمـنـا فـالـوقــت كــنــز الـصـنـاديـق هــــاذي مــرابــي لـلـجــدود الـعـريـبــه ويقول شاعر عتيبي ياناشدن عني من اية قبيله .! اخذ الاجابه دون زودن ونقصان انا من اللي يكسبون الجميله عتبان درعي لا تعزويت عتبان ويقول شاعر مطيري ياناشدن عني تراني من مطير من ساس حمران النواظر عروقي ربعي هل الردات مشبعتن الطير في حزتن منهم تروغ العقولي ويقول شاعر حربي ياناشدن عني ترى الاصل حربي من لابة ينسب لها العز والجاه !! شرق وشمال ومن جنوبي وغربي ما أظن احد يسمع نسبنا وينساه !! وعلى سبيل الطرافة يقول احد الشعراء عن البرد ياناشدنٍ عني تراني تجمدت مثل الدجاجه يومهم جمدوها وانا احمد الله فكني الرب مامت بغيت أموت وجثتي ادفنوها بينما قال الآخر ياناشدن عني تراني تجمدت الحق علي بالحطب واشعل النار انا على برد الشتاء ماتعودت جوي على طول السنه دافي وحار فيما شاعر خرج من دورة عسكريه قال بطرافة يا ناشدن عني تراني تعسكرت مسجلن جندي وهالحين دوره اصلع ومتشلهب وناحل وسمرت ومن شافني شاف العنى والخطوره السبت تحضيري والى جيت حضرت تدور فيّ الارض تسعين دوره والمشكله لو صار ظرف وتاخرت ماعندهم تقدير ظرف وضروره عزالله اني ياجماعه تدهورت واخذت مع صكات الايام صوره والقصائد كثيرة عن ياناشد عني ولكن نكتفي بهذا القدر
مرتبط
